Usalama wa chakula upo wakati watu, wakati wote, wanakuwa na uwezo wa kimwili, kijamii na kiuchumi kupata chakula cha kutosha na chenye virutubisho ili waweze kuishi maisha yenye afya na furaha.
Baa la njaa hupatikana zaidi katika nchi zinazoendelea. Kwa hivyo, kuongeza tija ya kilimo katika nchi hizi ni muhimu kupunguza njaa na umaskini, hasa wakati huu tunapokabiliana na kupanda kwa bei za vyakula.
Hapa kuna mapendekezo ya jinsi ya kupunguza baa la njaa.
Jinsi ya kukabiliana na baa la njaa
Kukomesha migogoro
Migogoro na njaa hutengeneza mzunguko mbaya. Vita vinapozuka, ukosefu wa utulivu huwalazimu watu kutafuta njia zisizo halali ili kupata mahitaji yao.
Pande zinazopigana zinaweza kupora chakula cha adui, kuharibu mashamba, mifugo, na miundombinu mingine ya kiraia kimakusudi. Migogoro inaweza kusababisha uhaba wa chakula na usumbufu mkubwa wa shughuli za kiuchumi, na kutishia maisha ya watu wote.
Wekeza kwa wakulima wadogo
Wakulima wadogo ni nguzo muhimu katika uchumi wa taifa, wao ni ufunguo wa kujenga mifumo endelevu ya chakula, kuendeleza usalama wa chakula na kukomesha baa la njaa.
Wakati ukosefu wa rasilimali unawazuia wakulima wadogo kuvuna mavuno yao, basi viwango vya njaa vinaongezeka katika nchi na mfumo mzima wa usalama wa chakula unaharibika.
Kukuza kilimo cha kisasa
Uboreshaji wa kilimo cha kisasa huandaa mazingira ya ukuaji wa viwanda vinavyo vinavyozalisha zana za kilimo, vifaa, mbolea n.k zinazoongeza mazao ya kilimo, kutengeneza ajira, na kuongeza fedha za kigeni kupitia mauzo ya nje ya nchi. Uboreshaji wa kilimo cha kisasa pia husaidia kufikia malengo ya kibinadamu kwa kuongeza mapato na tija ya wakulima maskini, kupunguza bei ya chakula, na kuboresha lishe. Kwa hakika, kufanya kilimo kuwa cha kisasa kunaweza kuboresha mtaji wa binadamu kwa kuwalisha watu vizuri zaidi na kuepuka matokeo mabaya ya baa la njaa kama utapiamlo.
Kushughulikia sababu za msingi za umaskini.
Umaskini ndio chanzo kikuu cha njaa. Kushughulikia umaskini kupitia maendeleo ya kiuchumi, elimu, na mipango ya afya inaweza kusaidia kuwaondoa watu kutoka kwenye njaa na kuboresha ustawi wao kwa ujumla.
Kukuza uzazi wa mpango
Watu wengi wana njaa kwa sababu wao ni maskini sana hawawezi kununua chakula cha kutosha. Lakini, wakati wanawake wanaweza kupanga uzazi, wanaweza kujitunza vizuri zaidi – kulinda afya zao, kupata elimu, na kupata maisha bora. Kwa hiyo, wao na familia zao wana uwezekano mdogo wa kuwa maskini na wenye njaa.
Kuwekeza katika miundombinu
Kuendeleza miundombinu, kama vile barabara, vifaa vya kuhifadhia na mifumo ya usafiri, kunaweza kupunguza upotevu wa chakula na kuboresha upatikanaji wa masoko, na kuhakikisha chakula kinawafikia wale wanaohitaji zaidi.
